堂堂國際知名嘅華特迪士尼公司，主動接觸本港幾間電子傳媒，商討合作設立迪士尼頻道，不料竟遭遇冷淡對待。
話說迪士尼最近分別搵過有線電視、新城電台同商業電台，想通過佢哋喺香港播放迪士尼為主題嘅電視同電台節目，例如迪士尼動畫或者迪士尼製作嘅流行曲咁，公關Irene話希望盡快成事。
八方重以為幾間私營傳媒機構會好似特區政府咁𦧲飯應，點知佢哋嘅反應，可以用「高竇」嚟形容。有線嘅公關話，成日都有人主動接觸佢哋，𠵱家未有嘢可以講；新城就話迪士尼主動搵過佢哋，而佢哋亦好有禮貌咁招呼過迪士尼，新城有冇興趣就要遲啲先算；商台含蓄啲，對外事務部話迪士尼同佢哋接觸過，內容細節唔會對外公布。看來最歡迎米老鼠，都係特區政府。
傳真︰2623-9278
電郵︰