對於章小蕙欠下巨債仍瘋狂購物，臨床身心行為學家李寶能昨日接受電話訪問時說：「一個人因為自己嘅生活內容而累積到咁巨額嘅債項，離唔開佢本身理財能力唔高，對自己嘅管理能力唔強，承受結果嘅責任感亦唔強，先會放縱自己到呢個地步。」
李寶能續說：「佢𠵱家重瘋狂購物，第一個可能性係佢本身對債項冇所謂，同律師商量過亦知道個結果會係點，佢亦唔在乎。但面臨緊破產嘅抉擇，佢本身判斷能力唔強，惟有通過食嘢或者買嘢，去證明自己好正常、好健康咁生存緊，呢個係狩獵行為，係自救同保護自己嘅方法，亦都係較為動物性嘅本能反應。如果係高層次思維嘅女性，就會去諗點樣去將自己嘅債務重組。
「第二個可能性係佢連抉擇嘅煩惱都冇，根本由始至終都若無其事，冇諗過嘢，只係諗住煮到埋嚟就食，買嘢只係做番自己，畀記者影吓相。」