呢排睇蘋果副刊，日日有港人北上創業報道，令大食Jack諗起一個人，佢就係將軍黎。
將軍黎七十年代尾喺尖沙嘴開舖仔賣星戰玩具起家，點知九十年代星戰無啦啦變成潮流Icon，連Nigo同Futura都嚟搵佢執星戰倉底貨。水鬼升城隍，將軍黎當時名噪一時。
可惜敵得過金融風暴，敵不過董校長嘅「精明管治」，供強積金又加上失業率高企門口零售即刻謝晒，最終將軍黎都喺半年前結束三十年基業。
闊別半年，以為佢老人家退休享清福去也，原來佢又膽粗粗走去廣州創業，搖身一變Bandai廣州專門店。
將軍黎：「我都係屬於勞碌命，唔可以停落嚟，本來諗住上嚟買屋半退休，不過見到呢度啲人消費力極強，似足當時我創業時七十年代咁好環境，咪開間舖做吓細路哥生意，都搵到餐晏嘅，好過香港貼錢搞舖頭喇。」
口痕友放料，話將軍黎食正搖搖熱，四、五月間竟一口氣散貨散咗四十五萬個搖搖，批發商都嚇咗一跳。無他嘅，香港人上到去嘅優勢係識包裝，食腦醒過國內同胞，呢點可算港人剩低唯一優勢。
主持人：大食Jack
八卦熱報：