今日係我毛毛（毛舜筠）最後一日同大家分享我打牌嘅心得，就等我講一下我縱橫麻雀界最光輝嘅一次，如何反敗為勝！
嗰次我同蘇絲黃、哥哥張國榮佢哋打，當日我運氣好差，五千蚊籌碼差唔多輸晒，心情梗係唔多好。去到最後嗰圈，北風尾最後嗰鋪，輪到我做莊，我就同啲牌講，你哋乖啦，如果唔係我三個月唔掂你哋㗎喇！
當時我做緊十三么，重叫緊胡，單吊南，就喺嗰時我摸咗隻花要補花，當時突然心血來潮，會唔會花上自摸十三么呢？摸上手捽兩吓，嘩，哈哈！真係南，結果一鋪返晒嚟，位位百幾番，之後我再冧莊食多鋪，唔單止唔使輸，重倒贏少少。
其實打牌同做人一樣，要有品，就算我輸錢都冇發過脾氣，我好怕人一輸錢又拍枱，又鬧人，咁我會同佢講：「你做乜嘢呀？咁拍枱重打唔打呀？」而且我一定唔會再同嗰啲人打牌，你哋話係咪？大家記住「打牌最忌缺牌品，輸錢事小惹人憎！」
（五之五）明日預告：陳啟泰
口述：毛舜筠 筆錄：馮美茵