羅嘉良同宣萱傳出緋聞後，噚日首次公開聚頭，喺龍蝦灣拍攝電視劇《流金歲月》，佢兩個毫無尷尬有傾有講同搭膊頭影合照，嘉良重同記者話：「總之同太太有新進展就會通知大家。」宣萱就話：「我唔會畀意見嘉良，只會做一個聆聽者，亦唔會刻意搵佢太太解釋，因為大家之前都好熟絡，佢會知道乜嘢事。」
此外，羅嘉良噚日喺無綫電視城教今屆候選港姐4號劉啓兒同14號黃珮妍做戲。嗰場戲係講嘉良同劉啓兒係情侶關係，但有晚因女友唔喺屋企，佢帶咗黃珮妍返屋企過夜，點知女友返屋企時撞個正着，搞到女友傷心到走咗。而黃珮妍就要求佢負責任，不過嘉良就對佢講：「唔好作嘢，唔好屈我。」
白韻琴同男友謝偉俊（阿Paul）噚日喺渣甸山嘅屋企擺賣二手貨攤，而所有收益將會捐畀善導會。
白姐姐噚日話：「賣幾多就捐幾多，唔夠二萬，我就貼到夠為止，總之我會捐夠二萬蚊。」而喺芸芸嘅二手貨中，竟然發現有陽具輔助器！
黎燕珊噚日帶兩個仔女到尖沙嘴新港戲院，睇迪士尼動畫《扮嘢小魔星》，不過黎燕珊為免大女上鏡，所以叫佢入場先，自己就同細仔隨後。黎燕珊喺兩個月前已為仔女計劃好今年嘅暑期活動，但講到會唔會同啲仔女出埠，佢話：「唔會嘞，今年經濟咁差，收入少咗，所以要慳啲。」
黃伊汶噚日到沙田新城市廣場出席MV《香薰浴》首播儀式，黃伊汶出場時重專登坐喺裝滿乾冰嘅浴缸度，營造出浴效果。黃伊汶對於公司不惜工本為佢呢張新碟做宣傳，難掩喜悅，佢話：「真係好開心，自己都第二次出碟，已經唔係新人，難得公司咁重視，而且因為我之前拍MV時俾啲乾冰整傷，所以今次公司幫我買咗七位數字嘅皮膚保險。」
張鎧潼、姚樂怡、洪欣、楊天經同導演唐季禮等，噚日喺中港城出席活動。洪欣同姚樂怡最近頻頻一齊工作，姚樂怡話：「下個月我同洪欣都會着宮廷服行fashionshow。」
洪欣重話細個已鍾意踢足球同守龍門，問佢會唔會訓練囝囝做球員時，佢話：「唔會啦，我好民主嘅。」
陳小春噚日喺台灣返香港，佢接受商台訪問時，話喺飛機度唔見咗部手提電話，返香港之後，已第一時間取消個電話號碼。小春咁緊張，因為電話入面儲存咗好多朋友嘅電話號碼，好彩佢係用女友、老婆呢啲暱稱儲存，唔易俾人知個電話號碼係邊個嘅！
周海媚前晚一個人喺銅鑼灣時代廣場附近行街，佢重入咗其中一間時裝店度，但逗留不過數分鐘便離開，未見有收穫。周海媚見到記者上前影相，表現得有啲愕然，但仍然保持笑容。記者問佢去邊，佢笑住話：「冇呀，行街之嘛。」
胡楓（修哥）噚日帶十歲嘅孫仔陳展鋒，到尖沙嘴新港戲院睇《扮嘢小魔星》。修哥話呢個孫仔啱啱喺英國返嚟香港放暑假，其他孫仔就重喺加拿大嗰邊，所以修哥只係帶呢位排第四嘅孫仔睇戲。而馮仁昭就覺得修哥個孫仔好黐爺爺，難怪修哥咁疼錫呢個孫仔啦。