德國奧迪車廠繼推出新一代A4車系及A4Cabriolet後，最近又公布咗有關新款A8嘅資料；新車不但擁有富年輕活力感嘅造型外，且有極具豪邁氣派嘅車廂布局，以及頂級版所採用嘅一台4.2公升V8引擎，所迸發出嘅335匹馬力，更為新車賣點所在。
從相片中可以睇到，新款A8豪華轎車嘅造型，明顯較現有型號來得更富活力感，當中一對炯炯有神嘅頭燈組合，就最能夠將呢個特點展露出來；車廂配搭亦與現有型號一樣，既寬敞又富豪邁感，設備配搭又見齊全，用落夠晒方便，另外當然唔少得重有多個安全氣袋，同埋充氣簾幕組合，以保障車上乘客安全啦。
機械配搭方面，廠方為新車配用兩台分別為3.7公升（280匹）及4.2公升（335匹）嘅V8引擎，匹配一套6前速Tiptronic半自動波箱，令性能表現更突出之餘；新車重裝有Quattro四驅系統、氣壓懸掛系統，以及四輪高性能碟式制動，從而予人有循迹性高及收放自如之感。有興趣嘅朋友，就要留意一下新車嘅推出日期喇。