睇上周四美股技術走勢，估計上周五美股應該繼續可彈，可惜美國公布嘅消費信心數據急跌，消費零售股下跌，杜指最後要跌117點，收8684，但由於科技股向好，納指企穩，微跌不夠1點。
市場對美國經濟復甦前景轉為悲觀，先前最多只係有人轉軚睇8月唔加息，現時則有人估計可能會減息。
美股偏高就係人都知，但之前市場對經濟復甦及企業盈利增長仍存有希望，一旦信心崩潰，杜指PE25倍確係企唔住，但對於港股嘅影響，趙飛雲就覺得未必咁大，而且美股嘅影響力會逐步淡化，近排港股走勢已經唔太跟美股，其實已經反映咗。港股現水平PE16.8倍唔算平，寄望美股流出嘅資金支持吓，維持大型上落市嘅走勢。港股大型橫行區底部10400係一個好淡關鍵位，確認失守要小心。
新地（016）據聞剛簽訂協議購入上海浦東一塊大型地皮，進軍上海地產對集團長遠發展有利，加上息口趨向仍對地產股有利。新地短期部署，短炒升至63元附近可伺機沽出，候58元補回，中線持有則以56元止蝕。至於中移動（941）回近22.50元附近可小敲，以21.50元作止蝕位。
趙飛雲