前輩賓架講澳門何生講到興起，把迪士尼與澳門新賭場合論。
前輩話：「香港為咗吸引迪士尼來港，撥地兼優惠，合約有如不平等條款，𠵱家又津貼地鐵興建竹篙灣支線，話就話發展旅遊，製造就業，實則未見其利，香港納稅人先捱棍八十，有冇回報，尚係未知數。你睇吓澳門吖，鏵哥一聲開放賭牌，吸引各方投標，淨收幾十億，再引到拉斯維加斯式嘅經營，對遊客好有吸引力。你話迪士尼開幕後，澳門新賭場開幕後，邊個吸引力大啲呢？就算五五波，人哋都收咗水先啦，邊度使挖荷包畀津貼？」
前輩未嘗無理。賓架C啱啱去完東南亞考察，睇過啲好嘢，亦見到唔少貪污事件，佢聽咗前輩一番說話，想起國際金融界友人提醒佢一個不新不舊嘅笑話，於是講出嚟，左丁山以前冇留意，笑到碌地，啲鬼佬賓架確係幾抵死噃。笑話好簡單：「知唔知道香港經濟點解會『插水』（diving）呢？答案係香港財政司司長愛上『插水皇后』（divingqueen）！」（用英文講重傳神）
賓架C另外一個笑話就舊一啲，仍然可笑一笑。李光耀與馬哈蒂爾一齊釣魚，啲魚猛咬馬哈蒂爾嘅魚鈎，唔騷李光耀。馬哈蒂爾嘅魚穫甚豐，洋洋得意。李光耀酸溜溜咁講：「你啲魚似足馬來西亞人，好飢餓，飯來張口，見嘢就咬。」馬哈蒂爾不慌不忙，回答話：「你啲魚似足新加坡人，唔敢開口。」左丁山諗，香港人似乜嘢呢？