上禮拜五納指雖然只係微跌1點，但杜指則急跌117點，成個禮拜計共跌去近700點。港股相對堅穩，5日計埋只係唔見157點，但喺美股唔生性嘅拖累之下，好難有運行，就算偶然間彈彈吓，彈完之後好容易又軟番。揸藍籌Call輪，輸錢易過贏錢，暫時要避開。
短線諗窩輪，諗Put好過諗Call。大市買跌，揀恒指Put輪。最短期、對大市反應好敏感嘅係9049，今個月底到期，現價18.6仙，溢價0.3%，槓桿率11.5倍。條數大約係咁計，恒指每跌100點，隻輪理論上升9%，恒指跌220點，隻輪升2成。
交投最多嘅恒指Put輪9205，9月至到期，現價11.6仙，溢價高好多，去到7.5%，但槓桿率又勁好好多，有30.6倍。呢件啱炒出炒入，但唔啱坐盤坐得太耐，始終溢價高咗啲。恒指上禮拜收10648，兩個幾月後計，跌唔夠800點（至9848以下），揸呢件要蝕本。
揸恒指Put輪想賭耐些少，可以諗吓9369，年底到期，現價29.5仙，溢價3.0%，槓桿率7.2倍。因為槓桿率細過上便嗰兩件，9369波幅相對細啲。
章 盛