夏日炎炎星期天，香港電台喺尖沙嘴一間戲院，招待三百個小朋友同埋家長，免費睇暑期電影《扮嘢小魔星》。八方喺涼浸浸嘅戲院裏面，見到立法會議員余若薇(Audrey)同老公胡先生嘅背脊，一人坐一邊，中間夾住三個小朋友。
八方上前打招呼，口快快問Audrey:「咁開心同先生帶兩個仔仔同個女睇戲呀?」
哈！點知Audrey笑笑口話三個都係女嚟㗎！八方即刻講對唔住，Audrey依然笑住咁話:「你唔係第一個搞錯㗎嘞！」胡先生就好鬼馬，細細聲咁叫咗旁邊個女一聲：「阿仔」。見佢哋一家五口，真係甜到漏油。
話時話，Audrey兩個大千金剪嘅「男仔頭」髮型，加上身形纖瘦，喺後面睇，都幾雌雄莫辨㗎！大女十七歲，喺美國讀書；二女十五歲，喺英國讀書，兩個都啱啱返香港放暑假，夾到時間，就一齊嚟戲院睇戲敍天倫。Audrey話，𠵱啲咁嘅戲院合家歡場面，一年最多先得幾次，佢重話同啲女睇戲時唔可以講嘢，如果佢向九歲嘅細女解釋情節，就立即會俾啲家姐殊㗎嘞！
Audrey嘅女雖然讀番書，但係都怕羞，唔畀八方影相，最後Audrey兩公婆坐埋近鏡頭一邊，先至有張合家照咋！
（圖）余若薇（左二）同老公胡先生（左一）帶住三個女，喺戲院睇《扮嘢小魔星》。
傳真︰2623-9278
電郵︰