唔講唔知，噚日係新鴻基地產上市30年。新地趁暑假檔期為旗下13個核心商場，以海陸空為主題，搞一連串適合青少年參與嘅活動，帶旺商場人流之餘，重有更深層義意，就係履行社會責任。
正如新地代理副總經理馮秀炎話，由於今年新地同突破機構都剛好30歲，目前香港人，特別係青少年，覺得好似處於失落無助環境，因此新地同突破花心思設計有益身心嘅活動，希望透過呢啲活動，鼓勵青年人能跳出灰色框框，積極面對人生，充實自己，另又可為突破籌款。
呢個為期一個月嘅活動，新地已動用過百萬元，重從美國同澳洲特別訂製沖天飛旋及滑浪大激鬥設備，前者已有得玩，在指定時間及商場，只要憑商場購物發票，再加5蚊，就可以一飛沖天。她透露呢5蚊係捐畀突破機構。現時已籌得約1萬蚊，目標係5萬至10萬。
複式單位，一般過千呎，最細都有八百幾呎，好似鰂魚涌康怡花園咁。但係細極都唔夠沙頭角剛開售嘅碧桐灣只得410方呎咁的骰，每層約二百呎，下層係廳同廚房，重有個迷你工作間，夠晒環保。上層只有一間套房，招呼人客時，客人去廁所，要跑上跑落，重要登堂入室，主人家有乜秘密，都一眼睇晒，完全冇私隱可言。電視機擺樓梯底。樓書介紹話，「個性生活，另類空間」。自覺無啲個性，唔夠另類嘅，就要考慮清楚嘞。410方呎嘅複式單位，都算夠特。
有時諗住去商場買衫，結果變咗買層幾百萬嘅樓，重三扒兩撥扑槌，呢種情況並不罕見。唔知係咪咁，愈嚟愈多發展商在商場內搭示範單位同售樓處。蘭西響紅磡打個轉，就一次過睇晒幾個盤。
長實在紅磡漁人碼頭商場有兩個售樓處，一個係海逸豪園，另一個係荔枝角盈暉臺。商場地下擺咗個海逸豪園模型，隔籬係租售處，1樓就有兩個盈暉臺示範單位。商場裏面到處都係呢兩個盤嘅宣傳品，幾乎每條柱都有一個廣告，第日啲柱位睇怕都可以賣埋廣告賺錢。
至於黃埔花園家居庭，正在搭建長沙灣泓景臺二期全新示範單位，外面就擺放兩個模型，有專人解答問題同派發資料，等啲人唔好忘記呢個盤。門口重有土瓜灣傲雲峰嘅攤位。
另外響黃埔號商場，就有深圳黃埔雅苑示範單位同售樓處。去紅磡行商場，忽然想買樓都唔使煩，因為梗有一盤響咗近。
暑假剛至，各大商場都要度橋吸引人流，蘭西同老友傾起，知道九龍灣德福廣場每年夏季都嚟一次「裝身」，今年花近百萬元「變身」大致完成，主題係「埃及古墓迷城feel」，今個禮拜招呼各行家去睇。蘭西畀各讀者先睹為快，大家睇睇有冇「盜墓迷城」氣氛呢？
據負責嘅老友講，今次最大特色係場內嘅大型獅身人面像，像真度極高，過去幾日引嚟不少小朋友圍觀同觸摸，保安部為安全計，築起圍欄。據老友講，本來重設計一啲機動猴子隨時彈出，製造驚嚇效果，但可惜猴子造型唔突出，效果大打折扣。
和黃深圳黃埔雅苑三期，近期大賣電視廣告，sell休閒度假feel，搞到蘭西都忍唔住走去紅磡售樓處睇吓，現場擺咗3個大模型。和記黃埔地產中國市務部總經理譚旭健話，個會所模型由深圳大峽谷模型公司做，比例係1比75，細緻到連啲人像都好逼真。
會所門口有好多羅馬柱，兩邊係水池，前面重有草地，好夠氣氛同情調，所以唔少新人都嚟呢度影結婚相，另外亦有唔少模特兒響度拍外景。由於佢哋只係在門口草地影相，所以發展商都奈佢哋唔何。
一期會所1、2樓各有萬幾方呎，至於相連嘅二期會所，地下3萬呎做超市，頂層係園林泳池。預計同於今年底開幕。
愈嚟愈多發展商在地鐵車廂賣樓盤廣告，蘭西有日搭地鐵，見到每卡車廂門都貼咗恒隆荃灣名逸居嘅廣告，可能因為示範單位設喺旺角雅蘭酒店，地鐵直達。名逸居5月中發售，𠵱家谷行廣告，睇嚟又有搞作。長實、新地同太古都在地鐵車廂或電子屏幕賣廣告，唔知係咪趨勢呢？地鐵多本港樓盤廣告，九鐵就多內地樓盤廣告，各有捧場客。
蘭茜
電郵：