謝霆鋒在台灣涉嫌推打《忽然1周》一名記者，昨日圈中人紛紛表態，年輕一輩多撐霆鋒，不過前輩如好姨薛家燕及張文新則不以為然。好姨認為霆鋒無論如何不應該打人，亦不可做傷害自己又傷害別人的事，而港台助理廣播處長（電視）張文新則勸喻霆鋒要檢點。
薛家燕（好姨）昨日以單親親善大使身份，以一身《皆大歡喜》的戲服造型，在西九龍中心出席「名駒熱Sun嘉年華」活動，雖然好姨要趕返電視城開工拍劇，不過她仍相當關心謝霆鋒在台灣與記者發生衝突的事件。
好姨說：「可能最近霆鋒成為新聞人物，記者追住佢影相，令佢煩躁冇自由，不過郁手就唔應該，就算對方點唔好，都唔應該打人，霆鋒要忍吓氣保持自己形象，尤其係近排發生咁多事，唔好衝動，凡事三思而後行，佢又係年少氣盛，可能係壓力大，每件事都帶畀佢衝擊，好似撞車同感情問題，加上輿論壓力，各方面打擊咁，情緒難免會低落，但真係要控制吓，唔好做啲傷害自己又傷害人嘅事。」
好姨續道：「我有個加拿大玄學家朋友都同我講過，話霆鋒有大關要過，忍到就可以過到呢一劫，希望佢唔好一時衝動，人嘅際遇隨時會變。其實我都好想同四哥（謝賢）講呢件事，不過又唔知點開口講至好，希望有機會打個電話畀四哥慰問吓佢啦！」
此外，港台助理廣播處長（電視）張文新，昨日在香港仔蒲窩出席「Ｕ時段」宣傳活動時，勸喻霆鋒行為要檢點，他說：「一個歌手修養行為好緊要，一、兩次負面新聞唔會被杯葛，我擔心長期太多就唔好，佢要檢點啲，有時一次就冇得翻身。我哋舉行好多健康活動，有時協辦機構注重歌手形象，咁會帶到難度畀我哋。」
採訪、攝影：魯萍、王連連