小初7月初曾提過，有人想接手炒起神州醫療（8186），點知話口未完，隻股已經被人炒高，但之前經紀陳話到明，炒家要收多一轉貨先至郁手，果然隻股稍為升穿60仙就回落。
不過，上星期五據聞有水到，隻股即刻生晒，大升12.5%，收63仙，成交明顯增加，有成1300萬元。
經紀陳話，因為長江生命科技（8222）就快上市，一眾醫療生化股都蠢蠢欲動，尤其神州醫療向來都傳有條大水喉射住，上周五急升，唔知係咪幕後想快手快腳挾番其他人啲貨出嚟？
神州醫療已經上市夠半年，可以進行抽水，股價造好啲當然有着數。
另外，小初上周提過嘅玩具股建溢（638），今日會公布業績，有位大佬向小初報料，話隻股上半年業績雖然勁升，但下半年就受911事件影響，但整體嚟講，都叫做對股東有交代。
慕容小初