世界盃過後，喺體育版見報最多嘅，一定係英格蘭中堅李奧費迪南，球迷都想知道佢究竟留喺列斯定轉會曼聯。據講，佢喺星期日度假後，重會立即同列斯新領隊雲拿保斯傾佢嘅前途問題。
不過，我求大俠就覺得李奧費迪南冇乜誠意嘞，因為如果啲英國報紙冇吹水嘅話，佢只係畀雲拿保斯一個鐘頭嘅時間，坦白講，一粒鐘可以講嘅嘢唔係咁多；究竟李奧費迪南係想考雲拿保斯嘅口才，抑或其實佢對自己嘅去留早已心裏有數呢？呢啲真係只有佢自己至知道。
效力新特蘭嘅前鋒菲臘斯突然出嚟話好有信心可以喺將展開嘅球季大踢好波，令英格蘭領隊艾歷臣對佢另眼相看，召佢入隊。雖然有信心係一件好事，但菲臘斯年紀都唔輕，二十有八，加上新特蘭嘅人腳又唔係特別好，佢咁講都似博見報居多。
我求大俠知道季初係中國甲A頭威頭勢嘅上海中遠，最近真係唔多順境，連埋前日作客輸畀波導戰鬥，已經連輸三場，搞到「范大將軍」范志毅都無晒符，而隊波日前住喺北京間酒店重出現火燭。好彩嘅係佢哋原來喺事發前兩個鐘頭已經執晒行李返上海，避過一劫，但連敗厄運就走唔甩嘞。
人紅自然多fans要求同你握手，高球明星活士前排患感冒參加唔到比賽，佢喺網上就暗示自己可能同啲擁躉握手時感染咗病菌，因此希望減少呢種身體接觸咁話。我求大俠夠成日感冒啦，鬼都知大部份感冒菌都係經空氣傳播㗎啦，有時真係好難避免，除非唔好出街啦！