賭王四姨太梁安琪由飲食業跳到按摩業，喺上環信德中心開設芬蘭浴場，噚日開幕剪綵，賭王何鴻燊、張耀榮等都有到。四姨太呢個場有九千呎，投資咗千五萬，最特別係有男賓facial同供應豬扒包。
太座做生意，賭王瞓身出馬，坐正中間做生招牌影相，佢笑言：「間舖我冇份㗎，不過未開張嚟試過，揼骨試過，踩背就冇。」四太有冇監場？「我好少揼骨，太太都冇幫我揼。呢度最新鮮就係男人都可以做facial，有人搽咗啲白色嘢上我塊面，可以搣番成塊皮出嚟，好神奇，我咁大個仔都未試過。」
提到有報道指十姑娘何婉琪將入稟查澳娛帳目，賭王話：「冇咁嘅事，根本未收到過半封信，得過講字，要入咪入到夠囉，兵來將擋，我食菜咁食。我響澳門四十年，咁易搞掂我？」賭王臨走時重神神秘秘咁話，下個禮拜將有關於十姑娘嘅「新鮮新聞」公布咁話喎。
﹙圖﹚賭王坐在芬蘭浴室的梳化上，心情靚絕。
傳真︰2623-9278
電郵︰