立法會喺上星期五開埋最後一次大會後終於放暑假，總結今年立法會工作，有議員同八方講，淨係搞個高官問責制已經疲於奔命，重有季尾嗰大堆法例。做還做，到咗呢個時間，就要計下班尊貴議員嘅出席率。
以往多年「榮獲」最低大會出席率、外號「三點不露」的李國寶，今年竟然俾霍震霆搶咗個冠軍，變咗「阿二」，今次寶baby真係失威！八方聽聞霍公子「奪魁」原因，係因為國際奧委會好多會要開，佢成日要去外國開會，搞到出席率跌晒。
不過有資深議員同八方講，其實所謂出席率低，低到極都有八成，主要係議員早知傳媒實會計出席率，於是就會安排星期三大會開會當日嘅工作盡量喺中環附近，甚至索性喺立會入面做私人嘢。
不過，由於每逢季尾政府一定推大堆重頭法例，議員成日行出行入「公私兩忙」，重偶然玩吓「失蹤」，就好易出事，好似反恐法因為咁而「蝦碌」。但係有位民主派議員就認為，凡係立法會季尾都係「邪邪哋」，容易出事，好似之前紅隧加費失敗，就係季尾拎上立法會投票，啱啱就有人趕唔切返嚟，於是咁就冇咗！
傳真︰2623-9278
電郵︰