李克勤有個拍拖十年的同居女友盧淑儀，但他竟從未將收入過女友手，反而把錢全數交由父母打理。而入行十六年仍未攞過男歌手獎項的他，更揚言待他圓此夢時，必會迎娶盧淑儀。
現年三十四歲的李克勤，與二十九歲的港姐前冠軍盧淑儀（Emily）拍拖十年，兩人更早已共賦同居，過着猶如小夫妻的生活，但原來克勤歷年都將所有收入交由父母打理，Emily基本上從沒錢銀過手。
「我係數字白癡，所以啲錢交晒畀父母打理，我有張卡，每次㩒機都有錢攞出嚟，冇乾過塘，所以我到𠵱家都唔知自己實際上有幾多錢喺銀行。Emily同我一樣，都係數字白癡，佢對時裝有興趣，我話畀錢佢做生意，佢就話唔得㗎，唔好啦，因為佢唔係追求呢啲嘢。」
Emily與克勤拍拖後即淡出娛樂圈，不少人都覺得是克勤有意收埋女朋友。
「我唔會阻止佢做任何嘢，佢做緊好多嘢你唔知啫，佢考緊高爾夫球牌，考到可以做教練。佢都想做幼稚園老師㗎，但佢咁惡死，點教幼稚園呀？都係教Golf好啲。」
與Emily相戀的十年間，克勤竟從未傳過緋聞，可見他對Emily確實桄榔樹一條心，非常難得。
「係啦，點解冇緋聞嘅？我同好多女藝人合作過，有好多都好索㗎！但索還索囉，屋企有件嘞，唔好咁貪心，無謂為咗一時之快吖！可能大家都知我有個穩定女友，又知我係一個唔鍾意出夜街嘅人，好多嘢都係夜晚發生㗎嘛，我就冇呢啲機會。
「我覺得唔係話專唔專一嘅，兩個人相處要舒服，一個五十歲嘅男人遇到個十八歲卜卜脆嘅，但屋企個黃面婆同你共度難關，呢啲係卜卜脆唔會有嘅嘢。譬如上吳君如個節目，佢話我哋已經比普通人幸福，談情說愛喺戲中做晒，劉德華都做過佢條仔（電影《愛君如夢》），唔需要現實生活都有嘅，拍電視劇我都遇到好多靚女，拍完咪番屋企囉，唔好搞咁多嘢啦。」
問傳了多次婚訊但仍未結婚的克勤，到底何時會拉埋天窗？克勤難為情地笑道：「我攞埋男歌手獎就結，等多幾年先啦！」