又係我毛毛呀，相信大家呢幾日都有睇我嘅星級教室，對於台灣牌已經有一定程度了解，咁你哋又有冇約啲雀友實踐吓呢？不過無論打台灣牌定廣東牌，點都有啲技巧嘅，等我過兩吓散手畀大家啦！
其實打牌真係要有啲實力，唔好以為博一博，就唔會咁頻撲，打得幾圈又或幾個東時，都大約估到其他三家要啲乜牌，要知道自己幾時要勇，幾時要守，當你當旺嗰時就可以勇，睇下家打乜牌應該可以分析到有乜牌可以打先，邊啲牌要留後。
如果自己好弱嗰時，千祈唔好諗住棄胡而狂誅人，要識得睇變化同執生，重要好謹慎咁去打，但又唔需要太緊張，應該抱住好輕鬆嘅心情。重有最主要嘅一樣，就係輸贏都唔好睇得太重，有時候就算幾有實力都冇用，運氣幾乎係嗰日打牌嘅致勝最大因素，輸晒啲錢咪第日再打過囉，無謂因為輸錢而影響自己或雀友嘅心情，係咪講得好啱聽呢！正所謂「打牌輸贏唔重要，領會牌章嘅巧妙」。
（五之四）
口述：毛舜筠
筆錄：馮美茵
攝影：陳志嵐