葉蒨文前晚喺尖沙嘴香港洲際酒店，出席佢同楊受成旗下新公司紅娛樂有限公司嘅加盟儀式，退隱四年宣布復出嘅葉蒨文穿咗D&G嘅透視上衣，十分性感，而小師妹「翻版鄭秀文」趙頌茹亦有到場，佢重負責向葉蒨文獻花㖭。
紅娛樂高層黃劍濤前晚同葉蒨文即場交換咗禮物，黃劍濤代表公司送咗一對價值五位數字嘅鑽石耳環畀葉蒨文，而佢就回贈公司一隻水晶駿馬，希望馬到功成。
葉蒨文話今年三月先至傾紅娛樂，但大家一拍即合，佢話：「我事前都同阿Lam（林子祥）傾過，佢都叫我唔好嘥時間，而且上天畀咗我識唱歌，我都唔想浪費。」不過，葉蒨文話佢冇同過老闆楊受成接觸，葉蒨文話：「我都要請楊生食飯，但大家時間唔啱。」葉蒨文表示若林子祥加盟，佢都唔介意夫妻檔上陣。
張衞健（Dicky）噚日以奧比斯光明大使身份出席喺荃灣愉景新城舉行嘅燃點希望呼籲行動，Dicky嘅前度女友宣萱最近俾人話係羅嘉良同佢老婆嘅第三者，問Dicky點睇呢件事？佢話：「Nothingtosay！」但講工作佢就大把嘢講，Dicky話：「我知道《西遊記》套劇喺台灣收視好好，我都好開心。」
吳文忻噚日出席喺尖沙嘴舉行嘅商場活動，吳文忻最近俾人呃咗兩次，佢話：「我早排同一間美容中心剪綵，點知佢用咗我嘅相賣廣告，而我遲啲同一間纖體公司拍廣告，我怕有衝突，所以已經發咗信畀佢，重有我早前用咗三十萬買咗架二手保時捷，點知個水箱係壞㗎，要整成十萬，我賣番出去蝕咗四萬！」
陳文媛（BoBo）同組合E-Kids噚日到奧海城出席「東方紅愛身體纖體計劃」活動，E-Kids嘅歌迷數量竟比BoBo多。問BoBo介唔介意？佢話：「我唔會介意，佢哋係新人，多歌迷支持係應該，但我都唔覺男歌手會多優勢，可能我嘅歌迷唔得閒嚟，而且我覺得女歌迷向來係長情啲。」而BoBo嘅緋聞男友陳冠希，日前曾講過話跟她一直有來往，BoBo就話：「我哋有傾偈，但同拍拖就係兩樣嘢。我不嬲都冇話過拍拖。」
許愿噚日凌晨接載一名女伴喺中環蘭桂坊出現，許愿一見到記者即刻開車離開。問許愿該位女伴是否新女友？佢噚日喺電話度話：「佢唔係我女朋友。噚晚（即前晚）一班朋友嚟我間餐廳食飯，我咪做司機送佢哋囉！」提到跟前妻李麗珍嘅欠債問題，佢就話：「呢個問題我話咗要封嘴。」
陳啟泰尋日喺旺角出席亞視遊戲節目《百萬富翁》宣傳活動，提到早前曾志偉話遊戲節目已經out，佢就話：「我都覺得係，不過節目內容我哋唔可以改得太多，始終《百萬富翁》係第一個遊戲節目，觀眾會唔捨得。況且我哋每集派出嘅錢都比其他遊戲節目多，呢嗰係我哋最大嘅好處。」
孫燕姿噚日去沙田新城市廣場，出席「FossilFeelTheGoodTimesShow」嘅活動。聽孫燕姿話佢得到好多廣告商贊助，好似有手提電話、手表、飲品、汽車同埋女性用品，不過佢最想就係有人贊助佢買樓。但係孫燕姿就從來都冇諗過要喺香港買樓，因為佢好怕香港嘅狗仔隊。
鄧小艾日前喺嘉諾撒醫院為男友張文聰生咗個男嬰，佢呢幾日都留喺醫院休息，張文聰連日都有到醫院探望。記者噚日重喺醫院裏面嘅一個兒童保健中心，見到小艾同張文聰去咗上育嬰課，不過，佢哋都好敏感，一直背住坐。