前滙豐主席桑達士爵士逝世。佢三十年前（一九七二）退休，做滿十年滙豐大班，期間又做馬會主席，係六十年代香港最有影響力嘅人物。桑達士在任之時，適逢恒生銀行擠提（一九六五），要搵滙豐拯救，咁就俾桑達士𡁻咗，成為滙豐附屬，事隔多年，只有一啲銀行前輩記得起。
前輩賓架憶苦思甜，講番一段澳門嘅舊擠提故事。前輩話三十幾年前，澳門亦有銀行擠提事件，受影響銀行諗嚟諗去，搵啲葡佬未必有用，於是最後派高層去見馬生何生。
馬生暫且按下不表，且說何生聽完銀行陳情，二話不說，即刻叫夥計用一個喼裝滿現鈔數十萬元，自己挽住個喼，與代表趕到銀行，何生大大聲對喺門口排隊攞存款嘅師奶講：「你哋咁麻煩，究竟做乜嘢？嗱，我嚟銀行存現金㗎，唔係嚟攞錢㗎，你哋驚乜嘢啫？」眾師奶見到何老闆咁信嗰間銀行，卒之一哄而散，銀行危機得以解除，何生在澳門嘅領袖地位，自此牢不可破。
前輩記得起呢段何生逸事，教訓左丁山認識何謂領袖魅力。
前輩話：「呢，此鏵不同彼華，鏵哥有乃父之風，領得住澳門，所以馬交𠵱家十分興旺，給澳門人好多希望；華叔就議而不決，壓唔到場，搞到香江人心虛怯，攬住個荷包唔敢使錢。阿鏵同阿華同得父蔭，表現會差咁遠嘅，你話點解？」
我哋啲後輩只係識聽古仔啫，邊度知點解吖，最好鏵華對換，阿鏵教阿華，或者華字加個金字旁，就會有金執呢！