本地藝人之中，有唔少係愛車一族，都以追求自己心目中嘅DreamCar為目標。在一眾熱門車款當中，除咗德國車受追捧之外，近期亦有唔少人改變一下口味，轉而購買系出名門嘅英國積架車，貪佢獨特穩重之餘，重有一份紳士味嘛！其中，最新簇會係陳浩民一部積架X-Type2.5型號；然而，早前卻傳出佢貪平買咗部陳列嘅DemoCar，查實佢係真金白銀以正價購入㗎！
早前，藝人謝霆鋒連番炒車，繼法拉利360之後，又炒咗部限量版SuperCar嘅奧迪RS4，令不少霆鋒Fans關注佢嘅健康。然而，身為當事人嘅霆鋒，卻好緊張佢嘅愛駒。早兩日，當佢部RS4獲警方批准，移離大嶼山小蠔灣汽車扣留中心之後，佢就第一時間搵助手Call部拖車，將部愛駒運往紅磡一間有唔少名人明星幫襯，專營歐洲汽車嘅改裝公司，睇吓能否修復咁話。及後小記搵嚟負責人Tony問過，話部車重有修復嘅機會，相信今勻霆鋒可以開懷笑番吓喇！