一般人對李克勤的印象，不外是招積及「寸」，克勤也承認自己以往待人接物的態度確實有問題，但隨着年事漸長兼碰釘的次數增多，他自言已有所改變。
「以前係嘅，連梁榮忠都話第一次見我時覺得我好寸。我乜都唔識讀讀吓書走去唱歌，唔識得點同人相處，成日連唔應該講嗰句都講埋出嚟。但慢慢人大咗，見嘅嘢多咗，碰好多釘，知道點樣待人接物，喺我二十五歲之後，我希望自己唔會再有呢啲事發生。
「有時愈係去啲平民化嘅地方聽人講嘢，你就愈可以知道自己畀人乜嘢感覺，好多藝人唔敢落旺角同深水埗，我就特登落去feel吓人哋點睇。旺角比較地道啲，你形象差啲都會俾人話。」
入行多年的克勤早已學識「不怕蝕底」的處世伎倆，但對於現今樂壇的新人，克勤則有其另類看法。
「𠵱家唱片公司嘅做法係首先將啲藝人整紅，無論乜嘢新聞都要每日見報，但將太多時間放喺維持人氣上，而唔係擺喺唱歌度，呢樣嘢就唔係太好，一分耕耘一分收穫嘅。我覺得容祖兒係個好有唱歌天份嘅歌手，佢擺好多時間喺人氣位上，但亦都可以保持唱片質素穩定。
「因為比較賣碟嘅歌手大部份都識唱歌，只靠賣樣嘅歌手為數唔多，買隻碟始終要一嚿水，講到尾都係唱片質素重要啲。影幾張靚相就想賣幾萬張？冇呢支歌仔唱咯。」
李克勤形容自己是個數字白癡，年少時瘋狂花錢，完全沒有金錢觀念，他說：「以前見衫又買、見車又買，𠵱家知道使每一蚊都要有價值，頂籠買件幾千蚊嘅嘢玩吓。」
當日克勤手持新鮮出爐具拍照功能的Nokia電話，他展示手機螢幕上的愛犬相片時，笑說：「買呢個電話玩都好開心啦，你記得影埋我隻狗呀。」
長大了的克勤無疑比前成熟，但童真仍在。
撰文：朱芷瑩
攝影：陳志嵐
場地提供：海逸酒店