上個禮拜隻「長命科技」（長江生命科技，8222）雖然錄到近120倍增額認購，但係個暗盤市場重係冷冷清清，似乎炒作欠奉。不過，唔知係唔係有心人為咗要省招牌，不停用怪招希望可以為隻股加油打氣，其中淨係睇到各大報章所登出嘅暗盤價就已經有好大距離，部份傳媒朋友更加話隻股喺星期二開市就即刻會見兩個八㖭。
不過據伏勝所知，自從長科截止申請嗰日計起，個暗盤價一直都係停留喺兩個二至兩個四之間，重係未有成交過㖭。話明隻股係無基本因素嘅，要搵人肯揸耐啲隻股，其實都有一定嘅困難。照伏勝話，抽到呢隻股嘅朋友，如果上市嗰日真係見到兩個八嘅話，不妨諗吓沽貨算數。
睇番個市，美股日日跌，對於買開藍籌股嘅朋友嚟講，一啲都唔好受，眼見手頭上嘅投資總值每下愈況，只可以歎句無奈。不過對於炒開二三線股嘅朋友嚟講，就一啲都無影響，淨係睇番過去呢幾日嘅升幅榜就會知，大棚二三線股升晒入去升幅榜。
好似隻上海策略置地（164）咁，自從上個月尾話發行認股證之後，已經好耐無聽到佢哋嘅消息，不過呢幾日突然嚟個180度大變身，唔單止個成交多番，重喺上星期五單日升咗一成二，成交額勁升，似係有啲嘢將會發生。伏勝問過班卜架朋友，好多人都無乜頭緒，但有線人話，因為有條大陸線嚟咗香港，喺有心人穿針引線下，低價攞到一批貨，班大戶就借勢炒起隻股。聽講話，隻股要升到去兩毫八至三毫之間，先至係第一個目標價。個市咁靜，要炒起隻股真係唔出奇。
伏勝