儘管李克勤的唱片一直賣得，由以前街知巷聞的《月半小夜曲》到《舊歡如夢》，以至近期播足一個月的世界盃主題曲《Victory》，他有過不少經典名曲，但入行十六年來，克勤偏偏未攞過四大電子傳媒的任何男歌手獎項。
「男歌手獎我梗係想攞啦，但唔見得攞唔到就代表唔成功，有時唔一定要有某啲嘢至叫成功有地位，我覺得開心簡單就夠。
「有一次我喺茶餐廳食飯，食食吓聽到隔籬枱電話響，我擰轉頭望下，有條四十幾歲頭髮甩甩哋嘅麻甩佬喺度講緊電話，但佢嘅電話鈴聲係我首歌嚟，嘩！原來呢條麻甩佬都聽我啲歌嘅，有呢啲事發生都開心㗎。
「其實我覺得自己算係好彩，冇獎又唔代表你輸，可能人哋靚仔啲，運氣好啲，或者真係唱得好過我呢！」
克勤雖然無緣奪男歌手獎項，但他卻有無綫這個大伯樂，更有無綫契仔的稱號。
「無綫係幫我好多，做《世界盃》同《勁歌金曲》會令我有民望，我同電視台嘅關係好奇怪，我幫無綫做好多嘢，連華仔（劉德華）都問我同無綫係簽乜嘢合約，我話：『冇呀，歌星約囉。』
我同無綫好有默契，但相對嘅，我同無綫合作多嘅原因，係有幾個原則要守，第一要聽話啦，冇一個人喺無綫唔聽話可以扭到計。第二就係平，無綫必殺技嚟嘅。第三瓣數要多，做大騷主持、搞笑、唱live（現場），有唔同嘅身份出現，有乜我都唔介意做，你情我願嘅，要有收穫就要付出。」