巴西球星朗拿度嘅「河童頭」由世界盃期間到咗𠵱家，仍然係大家茶餘飯後嘅話題，不過，可能大家好快冇得講喇。因為話說巴西有一間贊助商，佢哋同「哨牙仔」簽約時，講明唔准佢轉髮型，佢𠵱家咁做即係違約，所以要佢拿拿臨鏟光番個頭。
其實，朗拿度呢個情形，就好似好多女明星做咗某品牌洗頭水嘅代言人之後，唔剪短得頭髮或者轉髮型一樣，朗拿度冇理由唔知，呢啲可以話係名成利就嘅代價，要錢定要自由，你自己揀喇！
比拿利禾話富咸技術總監巴里斯大整蠱，佢諗住係巴里斯搵佢，去硬富咸，點知巴里斯突然話買人嘅嘢係領隊泰簡拿決定，於是比拿利禾轉會富咸即刻卡住咗，最弊嘅係比拿利禾已經推咗母會帕爾馬、保頓同伯明翰嘅好意，無端端搞到要失業，唔怪得佢嬲起上嚟，叫巴里斯早啲喺富咸執包袱。
曼聯龍門巴夫斯俾歐洲足協罰咗二千一百七十四鎊（約二萬六千港元），因當曼聯喺歐冠盃作客打和利華古遜而出局後，巴夫斯好㷫，一拳打爛球員通道嘅牆，結果被罰錢。計我求大俠話，巴夫斯咁好力，不如罰佢做擔擔抬抬嘅義工重好！
最近中國足球掀起反思熱潮，為早前世界盃決賽周成績作檢討，就連中國體育記者協會亦舉行類似研討會，會上就有記者再次篤爆部份傳媒作假新聞，影響國家隊士氣，重有就係毫無證據下話南韓收買球證先入到四強，令中國傳媒蒙羞。其實早前范大將軍都因為頂唔住呢啲假新聞要告某報館，而最近講李鐵轉會愛華頓新聞，一時話得，一時話唔得，搞到我求大俠信定唔信好呀？睇嚟都係勇於認錯，死不改過多咯！