SCE開發嘅《GT》系列一向受Game迷歡迎，新作《GTConcept2002日本～日內瓦》不但加入多款概念車供駕駛，而且亦會像《兩人的電腦花火》般，大搞試玩同比賽等活動，更邀請到GT之父山內一典先生到港跟機迷會面，可見呢隻Game受重視嘅程度。
記者、部份攝影：徐影龍 鳴謝：環宇汽車
機種：PS2
遊戲類型：賽車
開發商：SCE
發售日期：7月25日
售價：$185
(c)2002SonyComputerEnterteinmentInc.Allmanufacuturers,cars,names,brandsandassociatedimageryfeaturedinthisgamearetrademarksand/orcopyrightedmaterialsoftheirrespectiveowners.Allrightsreserved.
呢款《GTConcept2002日本～日內瓦》中文版以日本版《GTConcept》為藍本，由操作介面到說明都以中、英文顯示，香港人玩起上嚟零舍有親切感，對各種遊戲模式都更為清楚明白。
驟眼睇賽車Game改為中文化冇乜特別幫助，其實過往有好多玩家表示《GT》系列其中重要嘅考牌環節，往往因為睇唔明考牌規則而焗住放棄，今次轉為中文顯示後，一眾玩家可清楚明白各款考牌過關條件，終於可大顯身手，以挑戰S級考牌為目標。
今次《GTConcept2002日本～日內瓦》除咗改為中、英文雙語顯示外，其中最重要一環，顧名思義梗係加入唔少名廠嘅概念車，包括早排喺日內瓦車展內展示嘅新車，數目達到數十款，當中以歐洲廠商如ELISE嘅概念車為主，當然亦唔少得日本本土嘅概念車，如八月初先到港嘅三荾AIRTREKTurbo版等。
呢批概念車大部份都未必會大量生產推出市場，要一口氣駕駛咁多新款有型嘅概念車種，就要一試呢隻Game喇。呢款集大堆頭概念車嘅中文版遊戲，只限以香港為首嘅亞洲地區發售，日本反而冇得賣，加上送海報及賣價只為$185，就算已買之前嘅《GTConcept》，都值得買多隻作收藏。
《GTConcept2002日本～日內瓦》中文版喺7月25日正式到港，購買原裝行貨除可獲得精美燙銀海報外，重可透過SCEH網頁登記，參加一個名為「GT之父賽車祭」嘅活動，屆時會喺香港酒店招待入場嘅Game迷，會場特設六部由日本運到嘅GT賽車座駕作連線對戰，當然唔少得一眾賽車女郎同入場人士拍照留念。
最吸引可謂專程請嚟有GT之父稱呼嘅山內一典先生到港會晤一眾Fans及簽名，今次係首度在日本以外地方舉行簽名會，之後更會大派《GT》免提聽筒作禮物。活動名額只限首250名登記人士，手快有手慢冇，詳情可瀏覽SCEH網頁。
SCEH網址：