最近，EuroNCAP（EuropeanNewCarAssessmentProgramme）公布咗最新一份撞擊測試報告，當中用作測試嘅多款歐洲房車，其中四款在本港有售；為咗令大家能知道佢哋喺發生意外時，對乘客嘅保護程度達那一水平，故此今日特別為大家，帶來呢四款歐洲房車嘅撞擊測試報告，好讓大家能知得更多。
記者：鄭達基
近期頗受車迷歡迎嘅新版平治C-Class，在是次撞擊測試中所獲得嘅評價，較其他用作測試嘅車款來得更突出；其中對車上乘客嘅整體保護率，更高達97%。當模擬以時速64km/h正面撞向障礙物時，車上安全氣袋及安全帶，都能夠有效阻止駕駛者嘅頭部及胸部，猛力撞向軚盤或表板，以減低受到不必要創傷嘅機會；而車門於意外發生後仍可輕易開啟，亦可縮短拯救傷者嘅時間。
另外，當車子模擬被時速50km/h嘅汽車攔腰撞及時，設於車內嘅側氣袋及充氣簾幕，皆能保護車上嘅駕駛者及乘客，免受不必要嘅傷害。
正面保護率：88% 側面保護率：94% 整體保護率：97%
另外一款廣受用家歡迎嘅新版福特Mondeo，亦被EuroNCAP納入為測試車款之一，而測試結果亦屬中上水平。當Mondeo模擬以時速64km/h正面撞向障礙物時，雖然駕駛者嘅頭部及胸部，皆因有安全帶及安全氣袋嘅輔助，而大大減低撞向軚盤及表板嘅機會，但安全帶於撞擊後嘅拉力太大，或因而令駕駛者胸部受到太大壓力而受傷。至於進行側撞測試，模擬被時速50km/h嘅汽車攔腰撞及時，設於車內嘅側氣袋及充氣簾幕亦能及時彈出，可有效地保護駕駛者頭部，避免撞向車窗或其他物件而受傷。
正面保護率：63% 側面保護率：100% 整體保護率：82%
至於積架X-Type，在是次測試中所獲得嘅評分，亦屬中上水平；報告指出，車上嘅安全氣袋及安全帶，全都能於當車子模擬以時速64km/h正面撞向障礙物時，發揮至佳效能，大大減低咗駕駛者及乘客於意外發生後，頭部及胸部猛力撞向表板而受嚴重創傷嘅機會。而模擬當車子被時速50km/h嘅汽車攔腰撞及時，設於車內嘅側氣袋及充氣簾幕，亦能完全發揮效用，並可為車上乘客提供高達89%嘅保護，以減低受嚴重創傷嘅機會。
正面保護率：63% 側面保護率：89% 整體保護率：76%
標緻607亦係被納入是次撞擊測試嘅車款之一，當模擬以時速64km/h正面撞向障礙物時，車內安全氣袋及安全帶，皆能大大減低駕駛者及乘客，頭部及胸部正面撞向軚盤及表板嘅機會；但奈何車內中控台於撞擊後會向後移，因而有機會導致駕駛者腿部受到不必要嘅傷害。然而，設於車內嘅側氣袋及充氣簾幕，當車子模擬被時速50km/h嘅汽車攔腰撞及時，亦能保護車上乘客嘅安全，因而獲得不俗嘅評價。
正面保護率：63% 側面保護率：89% 整體保護率：76%