美股周四晚再顯強勁腰力，納指及標普創911事件新低後倒升收場，杜指雖仍跌11點，但較當日低位8605，已反彈近200點。收市後，戴爾電腦調高次季盈利預測，美股期指繼續向好，帶動亞洲股市噚日普遍上升，港股亦升89點，恒指收10648。全周埋單，恒指跌158點，跌幅1.46%。
噚日大摩碧斯表示，美股跌至現水平，短線投資有獲利機會。美股急跌後出現技術反彈，噚晚好大機會繼續升，如果係咁，港股下周亦會抽高，賀吓長江生命科技（8222）掛牌。
美股今次反彈由科技股帶動，噚日亞洲股市升得最靚主要係科技股，連跌足兩個月創新低嘅電盈（008）亦反彈3.4%。趙飛雲覺得電盈好似《絕代雙驕》裏面嘅「燕南天」，就算好得番都重有排醫，屬於不宜憧憬嘅股票，但短線唔排除會上試1.84元至1.92元區域。
如果美股噚晚繼續由科技股帶動反彈，則下周可優先留意中移動（941），中移動現水平風險有限，近排似喺22.50元形成底部，可作為止蝕參考位，初步阻力7月高位23.80元，破位上試50日線24.50元。
趙飛雲