隔晚美股有驚無險，港股反彈。藍籌中最醒係電盈（008），高收1.80元，升6仙，結果10大升輪中，有6件係電盈Call輪，升幅由22%至64%，不過成交唔成氣候。
一向最多買賣嘅9132同9111，成交金額分別只係五十幾萬同三十幾萬。
9132收8.4仙，升25%，11月杪到期，溢價12.9%，槓桿率21.4倍。9111收4.1仙，升64%，下月初夠鐘，溢價4.8%，槓桿率43.9倍。兩隻輪數據算係咁，由於屬細價仙輪兼槓桿率大，正股郁幾個位，兩隻輪隨時升跌幾成。
數據最靚嘅其實係9087，收10.5仙，升28%，今個月底夠鐘（得番約10日玩），溢價1.5%，槓桿率17.1倍。數據靚還靚，正股昨日彈升，估計係技術性反彈，升勢唔係咁易維持。電盈Call輪升後追唔過。
若然電盈彈多一陣，又可以諗吓調轉做，博電盈升勢撐唔住回落，買電盈Put輪。
電盈Put輪有兩件，9152比較啱博，下月夠鐘，現價36.5仙，溢價0.3%，槓桿率4.9倍。吼住30仙邊邊上車。
章盛