金牌莊家真係寶刀未老，連帶佢位公子主理嘅建星環保（8011）首日亦表現驕人，收42仙，較招股價20仙高出1.1倍，真係算唔錯。但係55球貨成交之中，有唔少係非自動對盤上板，所以實際成交唔算好多。
經紀陳話，雖然出面話金勞詹無份幫個仔手，但話晒唔睇僧面都睇佛面，成班世叔伯點會唔睇住及幫吓手，況且近年唔少大陸商家鍾意拜會金勞詹，所以另外有大陸水源幫手亦唔出奇。不過，小初始終對呢類全配售，兼且冇盈利嘅創業板股有啲戒心。
另外，一位有份幫建星手嘅世叔伯，由佢睇住嘅啟帆（646）將在下周一公布全年業績。傳統智慧教落，公司上市第一年業績，應該唔會難睇。市場傳聞啟帆今次公布業績有息派，家陣隻股成交雖然唔大，但過去1個月，股價守住50仙樓上，似想借勢炒一轉。
慕容小初