今年，中大頒授榮譽博士學位又搞新意思，八方收到料，中大決定今年底會頒授榮譽博士學位畀四個名人，包括香港奧運「風之后」李麗珊（社會科學榮譽博士）、被視為中國「國寶」嘅著名國學泰斗季羨林（文學榮譽博士）、發明「偉哥」造福全球男士嘅美國醫學教授弗里德．穆拉德（feridMurad）（理學榮譽博士），同埋最近爆冷奪得澳門賭牌而榮升為「新賭王」嘅港商呂志和（社會科學榮譽博士）。
四個名人中最多香港人認識嘅當然係珊珊，六年前佢實現香港奧運金牌「零的突破」，成為全港萬千青少年嘅偶像，今次成功戴上博士帽，再次證明佢嗰句名言：「香港運動員唔係垃圾！」但係若論德高望重，重係要算年屆九旬嘅季老。
季老是中國當代極負盛名嘅語言學家、繙譯家、宗教學家同民族學家，重係世界上極少數精通梵文嘅學者，上年十一月啱過九十一歲嘅季老成功破解北京著名嘅永樂大鐘上面嘅梵文，港台嘅「傑出華人」系列曾經介紹過佢，相信好多讀者都唔會覺得陌生。
傳真︰2623-9278
電郵︰