馬主H呻完保險費貴之後，決定唔買lossofuse嘅保險，之後碰到保險陳，於是又呻多幾錢。保險陳係「受益人」，當然笑騎騎。保險陳話：「今年啲非壽險，即係generalinsurance，加價得好快，原因有兩大個：第一個你都知，就係九一一餘波，全個保險行業都加價；第二個就係唔少中小型保險公司因經濟不景喇，賠償額大升喇，嚇到唔多敢做新生意。冇咗呢啲公司搶搶貢，削價競爭，我哋啲大公司就佔晒上風，霸晒議價能力，可以大膽加價而唔驚人客格價。阿黃，你明白未？」
阿黃當然明白。呢個經濟循環比較奇怪，美國高科技狂潮爆破與九一一影響，引爆咗會計醜聞，香港高樓價科技股泡沫連環爆發，加上無能領導，搞到大家不知所措，經濟係轉好呢，還是繼續不景呢？冇人知得清楚。既然如此，有得博懵就博，保險業乘機嗌高價錢，你我唔高興，都冇佢哋符。
聽保險陳一講，心念一轉，心郁郁想買美國保險類股票，但保險陳喝住：「咪咁快呀，大保險公司正為英龍、世界通訊之類嘅會計醜聞煩惱，暫時唔知道有幾多保險要賠，所以啲保險股重係上上落落，未有明顯上升軌迹，你要忍吓先。」忍到幾時呢，保險陳都唔知，呢個世界真係有先知，冇乞兒。股神畢非特都落注五億美元買科技公司可換股債券咯，太陽就快出來了？