噚日我毛舜筠教大家打台灣牌嘅基本法，今日就會教大家幾款台灣必殺技同埋點樣數番。
好多人都聽過「嚦咕嚦咕」，其實「嚦咕」即係「對子密籠」，如果一開牌已經有八對嘅話，咁就恭喜你，因為你已經叫八飛牌。因為要食「嚦咕」就要有七對牌再加一刻（三隻一樣），但一定要自己摸，唔准碰牌，食出「嚦咕」有四十番。
台灣牌都有雞胡，即係得一番，但就非常難食，因為台灣牌番數易得，每隻花都有番，如果你數極都得一番，咁你副牌就係雞胡，有成十番或十五番。
另外，「門清自摸」即係整副牌冇上或碰牌，最後一隻要係自摸，咁又有五番，而「獨獨」就係要食胡嗰隻牌，係單吊或偏將，咁又有兩番。另外，台灣牌有「五門齊」即係廣東牌俗語「三色雪糕」，筒索萬各自為一門，東南西北又一門，中發白又一門，合共就五門，都有成十番㗎。而一條龍即順序由一排到九，例如一萬排到九萬，咁又有十番。
此外，台灣牌都有十三么，但就多打三隻，即係要加一刻或順子（例如：一、二筒加三筒），不過就唔可以上或者碰牌。
（五之三）
口述：毛舜筠
筆錄：馮美茵
攝影：陳志嵐