美股周四叫做企穩，港股暫時可以鬆一口氣，避免下試一萬點心理關口呢一劫。恒指全日收10648，升89點或0.85%，成交又再縮番至55億元。因有部份資金轉為認購盈富（2800），噚日盈富再售出8500萬個單位，都成9億銀，現尚餘1.38億個單位，如無意外，下周一應該可以清袋。
國內充電池製造商比亞迪（1211）將發行1.3億股H股於主板上市，每股作價介乎9.45-12.20元，集資12.30-15.90億元，本月底正式掛牌。據聞此股是百記近期民企中得意之作，勢必全力催谷。市傳百記今次想獨食，唔會分貨畀其他承銷商，而且比亞迪大老闆講明3年內唔再配股集資，其實即係向炒家作出承諾，公司不會趁高價出貨，3年內街貨有限，各路炒家大可放心炒。因此，各位認購完長江生命科技（8222）及中銀香港（2388）嘅股民，若重有閒錢，可以諗吓比亞迪。
講開民企，歐亞農業（932）主席楊斌雖已返回瀋陽會見基金經理，應該已澄清謠言，但股價唔單止唔反彈，重大幅下挫6.6%。Cookie話，事關一名本來與楊斌係同一陣線嘅人士，忽然搞分裂，所以歐亞股份噚日繼續俾人掟，至於因咩事分裂，暫時不得而知，不過應該離唔開利益分配問題。
上海策略置地（932）噚日成交突然大增至4951萬元，股價上升近13%，收0.225元。此股早前曾宣布計劃配售一批認股證出街，行使價為每股0.22元，交易應該就快完成，所以幕後人士可以開車。
阿虎