話GBA係手提機中嘅王者，相信冇乜人有異議，不過剛剛推出嘅WonderSwanColour進化版SwanCrystal，真係挑戰到GBA嘅龍頭地位！
就以SwanCrystal發售首日嘅情況嚟講，鐵人眼見不少舖頭迅速將所有存貨賣清光，來勢你都咪話唔厲害，現時售價$510。至於遊戲方面，最多人連主機一齊買嘅Game首推都係嗰隻《FrontMission》，價錢大概徘徊在$290至$350左右。至於其餘兩隻和主機同步推出嘅《OnePieceSwanColosseum》及《Riviera》，銷情亦表現不俗，前者售價約$290，後者則為$300左右。
Konami暑期RPG大作《幻想水滸伝3》，終於喺今個星期正式抵港，而且在開賣首日，重有官方攻略本（$42）同步推出，真係照顧周到。梗係啦！《幻想水滸伝3》係華彩染指TVGame界第一個代理產品，當然要落足十成功力！
𠵱家香港行貨版Game價，大約在$380左右（連攻略），至於日本版就要$400左右！另外，要提醒各位準買家，今次隨Game重會附送紀念滑鼠Pad同海報一張，大家記得攞呀！
前排XBOX推出了全區碼晶片，好似連帶到XBOX主機嘅銷量都大幅度飆升；不過踏入呢個暑假檔期，可能各界Game迷已逐漸消化了這項消息，XBOX銷情好似開始有點冷卻下來，Game場老闆就認為，遊戲款式太少，始終都係一個致命傷。
不過今個月25號將要推出嘅《CrazyTaxi3》同《叢》，相信將會成為XBOX另一次熱爆點，皆因好多Game迷都對呢兩隻遊戲期待度甚高，鐵人就覺要多加留意隻《叢》，事關佢係XBOX射擊Game中招牌作，絕對值得一玩。
文：打機鐵人