劉德華噚日喺台北出席「籌建失智老人養護中心」記者會，華仔除咗幫大會拍宣傳片之外，重喺記者會上即席寫咗「善緣好運」四個大字，最後有善長以三百萬新台幣（約七十萬港元）買咗幅大字，不過買完又送番畀大會。
華仔同記者講話雖然同父母一齊住，但好少傾偈，佢都覺得應該多啲同屋企人溝通，享受家庭樂。問華仔對於自己嘅墨寶賣咗七十萬滿唔滿意，佢講笑話：「滿意，不過啲錢唔係畀我嘅，如果啲錢係畀我用嚟打官司就好咯！」
另外，華仔拍咗新歌《練習》嘅MV，內容講佢好細心照顧病咗嘅老婆，MV中嘅華仔冇時間食飯，所以成日食蛋撻，華仔拍嗰陣足足食咗七個蛋撻。 記者蔡如玉、仇志德台北直擊
身在台灣嘅張惠妹（阿妹），近呢兩個月成日早出晚歸，但佢絕對唔係好似佢前度男友周立璟咁成日掛住去蒲。阿妹之所以咁，無非係為下個月推出嘅新唱片錄音，先至搞到晚晚幾乎以錄音室為家。阿妹事事認真，令到同佢一齊做嘢嘅同事都覺得壓力好大。
王傑噚日接受陳淑蘭港台節目訪問時，又玩自爆，話自己早年由加拿大返香港做嘢嗰陣，曾經暗戀過一個長頭髮、瓜子口面嘅女仔，雖然對方係圈中人，但自己從來冇同對方合作過。而嗰次係佢一生人嘅第二次暗戀，至於嗰位長髮姑娘係邊個，王傑話點都唔會講喎。
無綫節目《一觸即發》前晚請咗一班藝員去玩慈善版，最後姚樂怡贏咗約兩萬蚊獎品同埋八千五百蚊獎金，不過佢一蚊都冇得落袋，因為係做善事，所有錢撥捐仁愛堂。賽前姚樂怡就喊驚咁話好驚跌落個窿度，重話唔明啲人點解會跳樓。姚樂怡又話冇諗過會贏，就算上次玩《智在必得》都係符碌贏嘅！
白韻琴打算賣衫、賣鞋、賣埋樓就離開香港，飛返美國，搵佢嘅新生活。白韻琴噚日喺渣甸山住所話人死乜嘢都唔可以帶走，生前就算搬都唔想帶走呢啲身外物，所以聽日佢會喺自己屋企售賣二十袋身外物，全數撥捐釋囚會，幫助出獄之後嘅人過番正常生活。
譚詠麟（阿倫）噚日去尖沙嘴出席「同心同根萬里行」活動，阿倫透露最近同張栢芝傾過電話，佢同栢芝講，話佢太瘦唔好，要增肥，𠵱家應該以做嘢行先。阿倫話都有打畀霆鋒，但霆鋒嘅電話次次都飛咗落call台。另外，阿倫話落實咗會簽番環球，等陳少寶返香港之後就簽約。
盛傳婚變嘅薛芷倫，最近又俾傳媒發現佢不施脂粉，同外籍猛男以及兩位朋友，一齊去北角踎大牌檔，食嘢食得好鬼滋味。噚日薛芷倫去商台為《毓民會客室》節目錄音，記者想話同佢傾幾句，問吓佢同外籍猛男係乜嘢關係，點知佢一支箭咁走開，真係冇晒佢符。
何俐恩（何嘉莉）最近喺台灣為「有事沒事郵遍天下」活動做代言人，日前佢喺當地舉行嘅記者會上，被封為二○○二年郵政天使，台灣中華郵政總局局長更即場將象徵郵政天使揹包頒畀何俐恩。何俐恩會上發。