中華城市燃氣（603）股價繼續企硬，成交量仍然好勁，但正如小初早排講過，唔少蛛絲馬迹都顯示班炒家散緊貨，但同系嘅上海策略置地（164）則見異動，聽講炒家玩緊switching，中華燃氣嘅炒股龍頭地位可能不保。
中華燃氣噚日最高見14.6仙，收13.9仙，倒跌0.71%，但成交金額仍有1.39億元，而上海策略置地就收22.6仙，升2.73%，成交金額有1000萬元。
想起早排中華燃氣炒到㷫烚烚之時，上海策略亦步亦趨，但成交就細好多。老實講句，上海策略多次易手後，除咗上海地產項目外，根本就冇咩炒作概念，純粹因炒家係中華燃氣同系人馬，所以先至順手炒埋。
經紀陳話，中華燃氣既然已經炒到荼薇，另尋新目標亦係正常事，但上海策略揀呢個時候開車，就好似唔多合時。
慕容小初