美股周三晚再上演大插水，港股噚日終於頂唔住，恒指大跌228點，收10558。
相對美股而言，港股表現已算好硬淨，杜指3日跌咗566點，恒指則僅跌245點，不過經噚日大跌後，恒指技術走勢有轉壞迹象，除非美股神奇出現大反彈，否則恒指將再考驗10400支持，甚至再試今年低位10291。
趙飛雲對港股後市並非太悲觀，恒指如果喺10400企穩，則可以憧憬再出現類似2月份嘅走勢，恒指2月份兩度下試10400橫行區底部守穩，3月至5月走勢一浪高於一浪，5月17日升至大型橫行區頂部12000才展開調整。假定恒指仍維持這個大型橫行區走勢，則10400附近可以博反彈，但另一方面，如果恒指確認跌穿10400，則要有心理準備可能見9000。
新地（016）係今次反彈嘅龍頭股，6月19日跌至56.25元見底，升至7月8日63.25元高位，受制於50日線回落，噚日險守20日線，收60元。技術方面，新地尚未全面轉壞，目前仍守住短線升軌支持（約59.25元）及20日線。若今日出現反彈，短炒可伺機在61元附近沽出，候57元左右撈番，中線則以56元作止蝕位。
趙飛雲