美股周三跌到變蛋散，港股自然難以獨善其身。恒指一度跌逾300點，10500水平一度失守，收10558，跌228點，在跌市中成交增至76.24億元。盈富基金（2800）連續兩日無人問津，市場重傳出，先前認購盈富基金嘅芬佬，開始在市場出貨。唔知佢哋係為咗止蝕定係想壓低盈富，再喺低位溝貨呢？不過，港股弱勢已成事實。
禹銘（666）又出招，以每股1仙收購中巴（026），大部份傳媒形容為敵意收購，其實禹銘今次只係想拓展新業務，目的並非是要透過收購中巴而獲利，因為禹銘最終要向中巴股東進行資產分派，禹銘只係從中收取管理及服務費，不過呢種手法就真係比較出位。
若禹銘呢一種資產管理服務真係Sell得，而市場又受落嘅話，相信好多投資銀行都會跟風，到時資產（特別係持有現金比重大）值高、股價低、股權分散及管理層唔夠積極嘅公司，肯定成為投資銀行「服務」嘅對象，到時會有大把好戲睇。不過，證監似乎對呢種「服務」手法持審慎態度，相信呢種「服務」要流行重未係時候。其實，呢類市場行為可以提高公司管治，證監毋須太緊張。
歐亞（932）噚日又傳出主席楊斌神秘失蹤傳聞，股價一度大跌逾10%，全日收市報2.275元，跌7.14%，成交4380萬元。歐亞方面話，主席只係出差，並非失蹤，今日會返瀋陽見芬佬澄清傳聞。其實呢一類傳聞已經唔係第一次，如果傳聞係假，後市必有反彈。
阿 虎