陳煒日前為一個內地服裝品牌BJC，拍攝新一輯秋冬便服廣告相，而呢個內地品牌嘅服裝設計，係由香港設計師PacinoWan操刀。
據知BJC上年用陳法蓉做代言人，而今年BJC老闆林先生，就改咗用陳煒，陳煒日前話：「我都係聽人講之前係陳法蓉做代言人，其他我都唔清楚。不過我都覺得自己同陳法蓉幾有緣，之前我拍個洗頭水廣告，嗰個老闆都有用過陳法蓉，可能賞識我哋嘅人都係一樣。」
陳煒繼續話：「今次嘅酬勞幾好，可以話係老闆畀得開心我收得滿意，遲啲我會幫佢哋去內地做宣傳，同埋行catwalk，不過呢啲又再另計。」
黎思嘉噚日喺菲律賓拍外景，但因為當地天氣不穩，黎思嘉騎馬時得到菲籍馬伕上馬幫助，馬伕更攬住佢嘅腰一齊騎馬。黎思嘉話：「我第一次騎馬，真係好好玩，但我對馬伕冇特別感覺。」而亞視新人陸依薩則收到菲律賓人送上嘅情書，佢話有人追好開心喎。
邵美琪噚日喺無綫電視城為劇集《皆大歡喜》試造型，佢喺劇裏面扮一個民女，但後嚟就入咗皇宮做妃子。鄭伊健前晚喺電視城錄影時，話過好想加入拍攝《皆》劇，重唔介意同邵美琪合作。但邵美琪介唔介意同鄭伊健做對手戲呢？佢噚日話：「我同佢（鄭伊健）合作都唔尷尬，但我真係唔想答呢啲問題。」
傅天穎（奀妹）噚日喺跑馬地出現，問到佢同陳容森嘅官司，佢話：「我同陳容森已經解咗約啦！前日去律師樓辦嘅。」問到賠償問題，奀妹話：「唔使，係和解，雙方都覺得咁樣最好。」問兩人𠵱家重係唔係朋友，奀妹就話：「見到面會打招呼囉！」
余文樂噚日去商台，幫手為「中銀愛心活力Team」活動其中打籃球嘅項目面試，余文樂示範點樣打籃球，重做埋入樽動作。最近佢前女友唐思盈（Natalie）傳出係羅嘉良婚變嘅第三者，余文樂對此話：「我唔知喎。我都好耐冇同佢聯絡，兩年都冇啦，我唔清楚嘅嘢，唔想講咁多。」
鄭秀文（Sammi）最新嘅廣東大碟會喺呢個月底推出，今次隻碟入面有一首歌叫《上一次流淚》，Sammi錄呢首歌同拍MV時都不停咁喊。問Sammi點解喊唔停，係咪因為首歌反映咗佢嘅心聲？Sammi話唔係，只不過係歌詞感動佢啫。