世界盃賽事完結，市場又回復正常，恒基噚日就為促銷大角嘴港灣豪庭而召開記者會。啱啱去完日本睇世界盃決賽嘅恒基張炳強透露，佢睇咗巴西對土耳其，同巴西對德國兩場賽事，重特登買咗件巴西9號球衣（哨牙仔朗拿度嘅戰袍）畀鴻運田國強，唔知同鴻運攞到港灣豪庭貨尾獨家代理有冇關係。佢話因為巴西一路贏，啲波衫價格水漲船高，炒到成千蚊件。
張炳強今次去睇世界盃之餘，原來重有秘密任務，就係去參觀電盈響日本新落成嘅商業大廈，佢話呢幢寫字好多特色，大廈環保同防震設計好好，啲玻璃重可以隨日光強弱而調節，令到室內能保持良好日光。用水經過濾後可以再用多次嚟洗手，先至用嚟做其他用途。最低幾層就係出名嘅四季酒店。
佢讚完人哋後，順便標榜吓自己嘅中區國際金融中心，大廈分開5區嘅設計，可以分散風力同減低震動。抬舉同行之餘又自提身價，張生唔怪得響恒基咁掂啦。
講番港灣豪庭，噚日發展商又搞搞新意思，記者會上忽然出現一對身穿禮服同婚紗嘅新人，原來係發展商今個禮拜會響樓盤現場舉行婚紗展，由儷都婚紗公司負責。
當然，亦都係配合噚日嘅優惠主題，就係畀新婚或計劃兩年內結婚人士買樓優惠。
內地樓盤來港推售，發展商同代理都會搵個地方做長期展銷廳，主要集中響九龍區嘅酒店同寫字樓，𠵱家就擴散到港島區。上海金豐投資屬下金豐易居房屋銷售公司，就租咗中環美國銀行中心做展銷場，面積4800方呎，呎租23.5元，計落每年租金過百萬，唔係小數目。
佢哋話揀中區做展銷場，因為所代理嘅樓盤係貴價貨，對象係白領同專業人士。究竟內地樓盤展銷場係單打獨鬥好，定係成行成市會佔優呢？
由中原（中國）代理嘅北京住宅盤御景園第二期新御景，今個月底響香港展銷，樓盤由4幢33層高大廈組成，單位面積1494至2491方呎，2房至4房設計。蘭西收到個盤嘅樓書，最感興趣係個廚房，發展商諗到用玻璃做間隔，視覺上較開揚，又唔似開放式，煮食時油煙四散。另外，樓書話個盤抽取地下溫泉，經過脫硫脫鎂淨化處理，為住戶提供多一種溫泉水供選擇，令到沐浴都變成享受同樂趣，聽落又好似好pro喎。樓盤發展商係發展上海世茂濱江花園嘅世茂集團。
御景園第一期已經賣哂，現時二手每方呎850蚊，月租每方呎約8蚊。
另外，有「小香港」之稱嘅深圳皇崗皇御苑，一期1590伙已經賣清好耐，二期就快會賣，面積650至1261方呎，2房同3房設計，預計首批呎價500蚊起，最平30幾萬。
坐私人遊艇揚帆出海，對富豪嚟講係平常事，但𠲖家有一批人唔使錢都可以享受到呢種待遇，就係馬灣珀麗灣嘅業主。新地雷霆噚日透露，集團用咗500萬，響東南亞買咗一艘55呎長嘅遊艇，業主可以book嚟開party或者出海，最多可坐35人，唔算細。費用全免，當然，油錢同食物要業主自己搞掂。但珀麗灣有5000伙，若果個個都book，每戶要等成13年半先至可以用到一日，等到頸都長。不過，因為10月就用得，第一期嘅買家就最着數，買樓之後第一時間可以book嚟用。
聽講艘遊艇叫藍鯨號，取其有度假悠閒feel，大家點睇？遊艇分上下兩層，上層係宴會室，下層為兩間臥室，其中一間有卡拉OK音響設備同影音器材。
蘭西記得，上月底上海家化置業話佢哋嘅上海家化濱江苑，都買咗艘遊艇，等啲住客可以租嚟暢遊黃埔江同長江。大家嘅構思都係差唔多，真係英雄所見。
另外，聽講新地響葵芳新都會廣場7樓搭建嘅示範單位，今個月22號開放，而6樓就設咗個影院，可以坐超過100人，但唔係播電影，係播介紹珀麗灣短片，片長5分鐘。
回歸之後，大方向變成中港大融合，雖然香港好多人都話呢個過程可能好緩慢，但原來新界樓價已經差唔多達到目標。中原地產周玉霞話，最近屯門單幢樓萬寶大廈高層E單位，380方呎，以35萬元成交，每方呎只係921蚊，低市價13%，同深圳樓看齊，甚至平過羅湖中心區樓盤。
萬寶大廈發展商係恒基地產，樓齡20年，單位346至388方呎，實用率有8成，都幾好用，所以吸引唔少上車客，今次買家都係上車客。聽講業主係因為移民先至肯平賣。新界樓價呢幾年係咁跌，好快就會同深圳差唔多，到時香港人會買番香港樓抑或繼續買深圳住宅？
地產代理係靠做成生意先有佣收，所以勤力係好重要，中原地產沙田第一城分行嘅周惠萍，為咗促成沙田第一城48座高層B室成交，不惜親身送訂上廣州，結果單位以103萬元成交，呎價2608元。
周小姐響呢個單位中可以收到嘅佣金應該唔係太多，但因佢服務態度好，所以業主肯幫佢畀車費。細價樓都服侍周到，可見生意難做。
代理幫發展商賣樓，好多時都要自己畀車馬費，但長實何雨盈就話，幫佢哋sell上環普頓臺嘅代理，帶客坐的士睇樓，會即時畀番的士錢佢哋。
點解咁筍？因為幾千蚊租部專車接載客人，好多時都無人坐，計落唔化算，反而畀錢代理搭的士重慳番好多。
蘭西
電郵地址：