昨日六月初二、庚辰日。據宋韶光老師話，呢一日宜祭祀、納財、栽種、捕捉。台灣《壹週刊》就揀咗昨日入伙。
聽台灣啲同事話，過去兩日佢哋搬嘢，又大風又大雨，但昨日陽光普照。四點半吉時一到，肥佬黎同總編輯裴偉一齊主持儀式，率領一眾高層拜神，肥佬話自己信教，所以冇揸香，只係負責切燒豬；大家叫佢要由頭一刀切到尾，好意頭喎。
新大樓位於內湖行愛路，係個新工業區，揸車十分鐘到台北，當然冇以前敦化南路喺正市中心咁旺，但地方大好多，而且係自置嘅。呢個物業，其實一共有兩幢大樓，每幢五層高，一層萬幾呎。
現在《壹週刊》用咗其中一幢，四五樓做編輯部，二樓財務行政部用，一樓做影樓，比以前闊落好多。至於另一幢就裝修緊，留畀台灣《蘋果》做辦公室。
堅哥周初飛咗過去，噚晚飛返嚟。聽佢講，台灣嗰邊嘅自置印刷廠，下個禮拜一就會動土。新廠位於桃園縣新屋鄉，地皮二十幾萬呎，坐車四十五分鐘可以到內湖寫字樓。現時已經訂晒機器，一切火速進行，睇嚟佢都有排忙。
《蘋果》九五年創刊，三年之前有自己嘅大樓，當日拜神切豬場面，八方仍記得。台灣《壹週刊》噚日出第五十九期，一年多少少，亦有自己嘅辦公室。肥佬嘅步伐愈嚟愈快，真係慢啲都追唔上。
傳真︰2623-9278
電郵︰