電視劇《我和殭屍有個約會》監製冼志偉前日因癌病逝世，終年三十四歲，可歎天妒英才。張文慈、萬綺雯、尹天照和姜皓文等都趕得及見他最後一面，張文慈昨日接受本報電話訪問時更泣不成聲。
亞視劇集《我和殭屍有個約會》監製冼志偉（阿冼）因鼻咽癌引發肝癌，前日在浸會醫院去世，終年三十四歲。
冼志偉加入亞視近十年，曾拍《南海十三郎》及《九七變色龍》等劇集，其中最為人熟悉的是九八年尾播映的《我》劇，因收視和口碑好，亞視開拍續集，前年播映時收視最高更達二十點，同年冼志偉離開亞視，自立門戶搞製作。
曾和冼志偉合作的藝人，包括萬綺雯、張文慈、尹天照及姜皓文等，前日都趕往浸會醫院見他最後一面。
昨日張文慈在電話講起阿冼，泣不成聲，她說：「我兩個月前先知佢有病，但唔知咁嚴重，佢唔想我哋擔心，噚日接到電話，見到佢最後一面。阿冼好錫我，對我好好，我亦好尊重佢，佢係人才，我同佢，重有阿照（尹天照）成日出嚟飲嘢，呢個圈唔係好多人對我好，我亦唔係好多朋友，我噚晚冇瞓過覺，真係唔抵，佢咁後生，佢係我一生人永遠嘅師傅。」
尹天照與阿冼相識十多年，他昨日說：「我同阿冼呢排成日一齊，噚日我睇住佢走，佢咁後生，真係世事難料！我同冼太通過電話，佢情緒都穩定咗，我都放心啲。」杜汶澤則歎自己未能見到阿冼最後一面，他說：「可以話冇阿冼就冇我，佢係我人生中最重要嘅恩人之一。」
陳啟泰昨日在亞視為新一輯《百萬富翁》舉行亮燈及拜神儀式，他說：「嚇死我！前晚有朋友通知我呢個消息，佢係我入亞視第一個識嘅監製，其實我知佢之前生膽石，後尾check到有肝癌，但唔係末期，重有睇中醫，聽講佢早排都好精神，我覺得好突然。」昨日記者亦以電話聯絡上冼太，她透露將為亡夫於二十一日在沙田寶福山設靈，二十二日出殯。
採訪：張止寒