大家係咪總有一個觀念，就係認為台灣牌規矩多多，又冇得做牌呢？但其實呢啲只係片面嘅講法，當你學識一、兩招竅門之後，你就會發覺樂趣無窮，同埋打多啲，腦筋都會轉快啲。
其實打台灣牌一啲都唔難，只須記低以下三點基本法，第一，比廣東牌多三隻（即十六隻），十七隻食胡。第二，要將上嘅牌放喺中間，例如：一、三筒上二筒，二筒要放喺兩隻牌中間。第三，自摸食胡嘅牌，要先開出，唔可以掂到其他牌，而其他牌亦要小心開，千祈唔好求其，因為一開到散晒，就變「斷橋」，咁就唔畀食胡㗎。基本上，你只要記低上述幾點，同埋抱住一個宗旨，就係有牌就上，有牌就碰，打出就食，千祈唔好話等自摸，咁樣你基本上都已經叫做識打㗎嘞。正所謂「學識打台灣牌，腦筋靈活唔會壞」！
（五之二）
口述：毛舜筠 筆錄：馮美茵 攝影：陳志嵐