新登場：
摩登上海菜　貪新愛舊

幾位揀飲擇食的年輕人，最近出錢出力在蘇豪區開設上海菜館，搵來入廚28年的同鄉「煮」理，讓自己及各位滬菜知音，隨時可以吃到正宗的家鄉小菜，餐廳格局並非古色古香，它在摩登入時當中加入古雅壁畫，一如餐牌菜式：集至In的創意菜及傳統家庭菜於一身。吃膩了蘇豪西菜？今日就重投祖國懷抱啦。

記者：楊一凡
攝影：伍慶泉

創意
陳皮牛肉$88
牛肉和廣東三寶──陳皮，從前大纜都扯唔埋，如今卻情投「味」合共冶一爐。牛肉先用醬油醃好，沾蛋漿炸至酥脆可口；一轉身快手快腳把陳皮切成小塊，起鍋爆香，跟手兜埋牛肉片，最後加牛肉燒汁及辣椒醬。搞掂！

試味報告： 牛肉帶點點陳皮香，別被左穿右插的辣椒乾嚇走，那是點綴而已，實際上肉塊並不辣。

魚香茄子薄餅$68
魚香茄子煮到家傳戶曉，還有乜好創新？在現有的配料豆瓣醬之上，再加秘製配料，又係秘製？酸酸辣辣一食就知係多加了酸辣醬啦。同場有薄餅和醬汁，跟足北京填鴨喎！才不，薄餅比雲吞皮還要薄，醬汁是海鮮醬而非甜醬，聽落幾有噱頭。

試味報告： 薄餅很軟熟，捲着香辣的魚香茄子，入口啖啖有料到，由於薄餅真的很薄，一點也不覺滯肚。

苔條黃魚$138
苔條是上海話，意思是新鮮的紫菜，其色水仍保持翠綠，味道較紫菜乾濃一點。上海人對黃魚有點情意結，食極唔厭，大概是貪其清甜嫩滑，四季常鮮吧！把去骨的黃魚切件，加適量調味，沾滿鮮紫菜脆漿，炸到吱吱聲，撈起隔油，就食得啦。

試味報告： 套了紫菜外衣的黃魚，入口倍添香脆，嫌淡？蘸淮鹽同吃啦。

傳統
毛豆年糕炒蟹$150
全店至貴價的菜式，動用私伙家傳醬汁去炒年糕和蟹。由於時間關係，年糕一早浸好，切片加秘製海鮮醬同炒；這時約一斤重的膏蟹，亦需落油鍋，炸好隔油，加私伙家傳醬汁，兜兩兜，盡吸鑊氣，然後跟年糕匯合，惹味出場。

試味報告： 炒年糕無論熱食或凍食，都軟熟可口，值得一讚，私伙醬汁碰上充足鑊氣，特別滋味。

百葉結烤肉$60
烤肉看似東坡肉但烹調過程大有不同，先把切件的豬腩肉放入深黑色的醬油鍋中，讓豬腩浸兩個小時，上色入味，醬汁配料有花雕、豉油、桂皮、八角、草果、葱和薑等。浸好後蒸熟，要是燜的話肉質無咁結實。一收到柯打腩肉連百葉結及醬油同炒。

試味報告： 百葉結染了一身醬油色，意味着渾身都是醬油味，腩肉經兩小時慢火蒸熟，軟腍不膩。

上海雙妹嘜$68
雙妹嘜是指自選雙拼頭盤，餐牌上有齊各式地道小點，例牌菜雞絲粉皮、素鵝、蒜茸青瓜及醉雞等，當然榜上有名，想不到連較為刁鑽，兼花時間的桂花糖藕和糯米紅棗，這裏都有！鄉里自煮果然夠親切地道。

試味報告： 爽甜的蓮藕，沾滿桂花蜜糖，咬下去糯米煙韌清甜；糯米紅棗要逐粒逐粒釀入糯米，味道甜而不膩。

店名：上海灘
電話：28108800
地址：中環蘇豪伊利近街38號地下
座位：30個
營業時間：上午11時至晚上11時
付款方法：現金及信用卡(A.E.,Master,Visa)