大家好！我係毛毛（毛舜筠），由今日開始我會一連五日喺《蘋果日報》娛樂名人版嘅星級教室，同大家講吓我打麻雀嘅心得，重會教大家點樣打台灣牌，同台灣牌嘅取勝之道。
我毛舜筠識打台灣牌都成十幾年，咁大家又知唔知係邊個教我吖？係狄龍大哥嘅老婆陶敏明，其實當年佢都唔需要特別講解，基本上我一學就識，可能我天生對數字遊戲比較快上手。
其實我嗰時已經識打上海牌，根本台灣牌嘅打法係由上海牌演變而嚟，咁我梗係好快上手啦。
自從學識打台灣牌之後，同我喺麻雀枱上較量過嘅人都有好多，老牌腳就有劉天賜同楚原，何守信都有打過一、兩次，而近呢幾年打嗰班就有蘇絲黃，梁李少霞，咁當然唔少得重有我嘅好朋友哥哥張國榮啦。
講一啲我同哥哥打牌嘅好笑嘢你哋聽吓喇，我兩個好鍾意一路打牌一路唱粵曲，佢扮任劍輝，我就扮白雪仙，總之你一句，就我一句，而隔籬嗰兩個都慣晒，都唔會理我兩個。
不過計我話，打牌嗰陣時都要集中精神，要留意上、下家點出牌，咪分分鐘掛住玩，玩到走漏眼。咁我同哥哥梗係例外啦，我哋啲牌章咁高，如果唔係就會變成「打牌嗰陣掛住玩，好易輸到眼坦坦！」今日熱吓身先，聽日繼續。（五之一）
口述：毛舜筠
採訪：馮美茵
攝影：陳志嵐