盈富基金（2800）噚日又無人問津，恒指收報10787，跌55點，成交不足50億元。投資者仍專注於長江生命科技（8222）及中銀香港招股，港股似乎有排淡靜，歐洲股市噚日又大跌，相信今日都係淡友天下。
得利（897）完成收購位元堂，宏安（1222）及康健（8138）減持60億股得利，每股配售價為1仙，較停牌前收市價大幅折讓76%，但得利股價噚日不跌反升，單日勁升73.8%，收7.3仙，即係話呢60億股承配人即時帳面賺3.78億元。
不過，據聞此股可以炒得咁勁，主要係呢60億股配畀自己友，街貨唔多，聽講自己友以孖展認購呢批股份，因此一定要踢高股價，以借取更多資金。呢60億股得利，現時市值4.38億元，以借6000萬元計，孖展額只係市值嘅13.7%。
南華資訊科技（175）新大股東減持後，股價下跌37%。新大股東ProperGlory，以每股0.10元配售５億股，套現５千萬元，配售價大幅折讓89.8%。
ProperGlory由賀學初控制，其實今次收購南華資訊嘅手法與四海互聯網（755）相似，都係以大幅折讓價，大量認購新股來收購控制性股權，當股價炒高後，再以大幅折讓價，減持現有股份套現，當所套現嘅資金相當於收購控制性股權嘅總投資成本，股價便開始下跌，而且很難反彈，所以今次南華資訊大股東減持後，股價唔睇好。
阿 虎