各大型地產代理行都話今年要大事擴充分行，搶市場佔有率，細行睇見咁環境都唔執輸。世紀21奇豐自6月至今，響馬鞍山連開2間分行，令到分行增至5間，其中4間喺馬鞍山，另1間就響西沙，擺明係想喺該區稱王稱霸，淨係計分行數目，同區內大行都有得揮。睇嚟啲大行今次遇到勁敵嘞！
世紀21奇豐董事李峻銘話，公司響沙田做咗10年，近3年先搬入馬鞍山，因該區範圍大，增加分行係想加強競爭力。新開嘅係富寶花園分行同西沙分行，李峻銘話10大成交量最多嘅居屋，馬鞍山錦豐苑同富寶花園都榜上有名，佢哋就喺兩屋苑都有分行。另外西沙分行就主力做村屋生意。𠵱家世紀21奇豐可以包抄晒區內所有類型物業代理，包括豪宅、私樓、居屋同村屋。
李峻銘透露，今次開兩間分行，同埋將其中一間換個位置，夾埋使費唔夠100萬，現有人手都係20幾人，屬於小本經營。不過佢話除咗沙田嘅行家有一team人過檔之外，重會請啲新人，以紓緩人手壓力。下半年目標係做鞏固工作。
以招收加盟店形式經營嘅世紀21，總公司方面話，世紀21奇豐𠵱家變成最多分行嘅加盟店，第二位係將軍澳世紀21安興物業，有3間分行。
中原老闆施永青，啱啱蝕賣揸咗超過10年嘅西貢清水灣道獨立屋，帳面唔見咗310萬。間屋兩層高，3400呎，花園萬幾呎（部份係政府租借地）連私家泳池。施老闆喺92年以1610萬買入，原本住得好寫意，但係為咗方便啲仔女返學，搬咗出九龍塘，間屋就丟空。近排佢有意重建間屋出租，點知咁啱利嘉閣有客睇中，出價理想，終於以1300萬成交。呢間大屋有成50年樓齡，重建嘅話，最多可以起到6000幾呎，差唔多係𠵱家嘅兩倍。
呢類罕有大屋，成條清水灣道得十幾間，上次成交喺兩年前，鷓鴣菜創辦人個女張紫珊，將間1萬呎嘅祖屋，賣咗畀個中港商人，成交價6000萬。
發展商賣樓，好多時都會先測試市場反應，然後至定開售細節，咁就可以保證唔會出現冇人買嘅場面。好似香港興業愉景灣海澄湖畔二段，發展商屬下嘅愉景物業，已經登晒廣告，話就嚟賣，高調講明只得8間花園屋，暗示有買趁手，想知道詳情，梗係要搵佢哋。愉景物業重順手話埋會擴充請人，不過可能因為嗰區外籍人士多，所以聲明要識流利英語至有望獲聘。個廣告提到有好多福利，好似醫療保健、公積金（唔係強積金），重送埋船飛畀員工。𠵱家坐船入愉景灣，一程都要二十幾蚊，若果要員工自己畀，都好重皮，隨時計完數縮沙唔肯做。
荃灣有個三棟屋博物館，好多人都去睇過，荃灣老一輩好熟悉陳氏家族祖業。陳氏家族係田心鎮客家人，響清朝乾隆五十一年搬到荃灣住，傳到第十代陳流芳，重攞埋太平紳士銜頭，認真威水。佢老人家早喺上個世紀五十年代響荃灣起樓賣，主要起村屋。𠵱家佢哋家族響荃灣重有唔少物業，今個月底開賣嘅荃灣碧翠臺，都係佢哋所發展。
踏入暑假，就有小學校服公司擴充業務。據中原林子健講，呢間校服公司以每月4.63萬元，租咗林百欣嘅長沙灣百欣大廈地下1400方呎，連埋5000方呎嘅閣樓。地廠將會做校服展覽室，而閣樓就用嚟擺貨。做校服做到可以開展覽室，佢都算巴閉。一個月要畀四萬幾蚊租，一年就要五十幾六十萬，計計吓，一年咪要做好多生意先可以圍到皮費？證明做校服果然係一門賺錢生意。睇見每年啲阿媽幫仔女畀錢買新校服、新鞋，搞到蘭西對校服呢門生意都有啲心郁。
上半年完結，各代理行埋單計數後，對做得好嘅員工自然會有獎勵，所以近期代理行升職嘅消息特別多。中原康怡及鰂魚涌區成績突出，有8個代理做到40.8萬或以上生意額，達到公司要求，可以升職。8個代理中，施建宙最勁，半年做到85.4萬數，主要係佢精通日語同福建話。蔡麗榮就做到74.5萬數，平均每月開單近9張，攞埋該行頭3名最多單數獎。兩人與柯遵標同楊文傑一齊升為高級客戶經理。至於葉敏潔、王嘉慧、袁廣達同區健棠就同升為客戶經理。
另外，利嘉閣北角半山雲景道分行嘅羅鈺薇，上半年做到70萬數，連升兩級，變成高級客戶經理；盧浩有60萬數，晉升高級客戶經理；郭慶華都有過40萬數，獲提升做客戶經理。只要努力，肯定有發圍機會。
香港置業主席黃建業響「港置力量創建明天」全民大會，講到未來兩年會全面擴充，有成20個區經理、總經理同董事職位等大家坐，而每3個精英就有一個有機會晉升，各位員工好努力嘞。
蘭西
電郵地址：