芸芸洋官裏面，最為巿民熟識嘅莫過於房屋署前任署長苗學禮，除咗因為近年公屋短樁問題令佢「人氣急升」，同埋佢講得一口流利嘅廣東話外，最令人印象深刻就係佢嗰把好有「拉登feel」嘅鬍鬚，原來呢把鬍鬚好有歷史價值，幾十年嚟只係剃過兩次。
啱啱調任財經事務及庫務局常任秘書長（財經事務）嘅苗學禮噚日請食晏，八方乘機問吓佢把招牌鬍鬚嘅來由。苗學禮話佢十八歲開始留鬚，到𠵱家為止只係剃過兩次，一次係因為下巴生咗粒大孖瘡，迫住要剃晒啲鬚；另一次係第一次有假期同老婆去旅行，於是應老婆要求剃清光。
苗學禮今年五十二歲，計起上嚟佢把鬚足足留咗三十四年，佢話當年留鬚係因為有一次阿媽同家姐返咗鄉下，得番佢一個響屋企無王管，索性連鬚都費事剃，阿媽返嚟見到佢，嚇咗一跳，即時下令要佢剃晒啲鬚，但年少氣盛嘅苗學禮就一聲：「No!」拒絕咗。
七二年加入港府任職政務官嘅苗學禮，到今年九月五日便來港足足三十年，佢話做開房屋工作，一時間去要處理財經事務，唔係想像中咁易，佢用流暢嘅廣東話話：「財經事務啲英文詞彙好深，就連我哋係鬼佬都唔明。」
傳真︰2623-9278
電郵︰