估唔到利物浦喺呢個夏天竟然係英超幾隊勁旅之中，增兵方面做得最積極同埋最爽手嘅球隊，佢哋嘅球迷當然會為一個又一個球星加盟而開心到不得了，但係隊中一啲邊緣球員，就真係唔得你死囉！
好似喺歐冠盃十周年最佳前鋒選舉中暫時領前嘅芬蘭球星列馬倫咁，以前已經俾奧雲同希斯基頂住個正選位，𠵱家重多咗個迪奧夫同佢爭前鋒踢，中場又可能會有保耶來搶位喎！最慘嘅係，一早見勢色唔對，諗住走返去阿積士嘅佢，最近連阿積士都話唔諗佢住㖭！
唉！我求大俠雖然就唔係列馬倫嘅Fans，不過見到佢呢啲咁好波嘅球員，竟然有咁嘅際遇，就真係有啲心噏。時下好多後生仔成日話自己懷才不遇，睇下列馬倫個Case至講嘢啦！
曼聯喺今個禮拜六會去愛爾蘭，同當地球隊沙爾般尼踢友誼賽，領隊費爵爺就事先張揚話會派遣最強人腳，包括隊長堅尼上陣。愛爾蘭方面即有口痕友話，會搵國家隊領隊麥卡菲番嚟客串沙爾般尼嘅領隊去對付堅尼！我求大俠就諗，咁樣可能更激發堅尼嘅鬥志，到時主隊輸得重大鑊就更加令佢哋球迷無癮就真。
紐卡素件法國翼鋒羅拔日前話，球隊嘅操練量大得驚人，食完嘅午飯都未消化，就又要開始下午嗰課操練，幾乎練到嘔咁濟。聽佢咁講就真係好似好辛苦，但我求大俠就覺得，佢哋領隊卜比笠臣執教經驗豐富，定出嚟嘅操練秩序應該唔會唔Work。羅拔仔，唔辛苦又點得成功呀！
最近有人見到英格蘭幾名國腳，包括李奧費迪南、戴亞、A高爾等，去咗美國賭城拉斯維加斯玩，重話佢哋喺賭枱上面輸咗成千鎊；李奧費迪南就回應話無咁嘅事，最抵死嘅就係佢重話如果真係輸咗成千鎊，實俾佢阿媽鬧死喎！我求大俠覺得既然佢真係咁驚佢阿媽，又難怪佢唔認嘅！